O encontro, que se celebrará a partir das 18:00 horas nunha carpa instalada na Praza do Recheo, contará ademais coa presencia do vasco Iñaki Iturriotz e a catalá Catarina Canyelles
Poñer en valor o noso patrimonio oral e difundilo entre veciñanza e, especialmente, entre os máis novos como garante de continuidade e conservación son os obxectivos da
I Xornada de Improvisación Concello de Ponteceso, que se celebrará o próximo sábado 27 nunha carpa instalada na Praza do Recheo.
A actividade, promovida polo Servizo de Normalización Lingüística que dirixe Carlos Penedo Casmartiño, contará coa participación dalgunha das voces máis destacadas da
regueifa na Costa da Morte e outras procedentes doutras comunidades.
Así,
a partir das 18:00 horas dará comezo un encontro interxeracional e multicultural no que poderemos ver a mestres regueifeiros/as bergantiñáns tan experimentados/as como
Suso de Xornes, Lupe Blanco, Alba María e Antonio de Xornes fronte a un grupo alumnos/as de regueifa e improvisación oral en verso do
IES Maximino Romero Lema de Baio , herdeiros/as da nosa cultura e responsables de dar continuidade a esta fermosa e apaixonante tradición, tan arraigada na nosa comarca.
E para completar un cartel de luxo contaremos coa presencia, por primeira vez, do
artista vasco Iñaki Iturriotz e da
catalá Catarina Canyelles, encargados/as de dar a réplica nunha tarde que promete diversión, arte e moita tradición. Vala perder?