RENOVADA A PISTA QUE UNE A AC-419 COA ESTRADA DE PAZOS A LANGUEIRÓN POR PRETO DE 48.000 EUROS

O Concello de Ponteceso acaba de rematar a mellora da pista rural que conecta a AC‑419 (o tramo Ponteceso–Buño) coa vía que une Pazos con Langueirón, nunha importante intervención promovida no marco do plan municipal de mellora de pistas. Esta actuación local enmárcase dentro do Plan Camiña Rural impulsado por AGADER en 2024‑2025, cunha inversión próxima aos 48.000 €, e supón un paso máis no compromiso do goberno municipal por fortalecer a mobilidade no medio rural e apoiar o sector agrícola.

Na parroquia de Pazos, esta nova pista municipal dálle continuidade á intersección entre ambas estradas, facilitando o tránsito de vehículos agrícolas, gañando en seguridade e mellorando o acceso ás explotacións. Trátase dunha aposta decidida por infraestruturas eficientes que favorezan a dinamización económica do rural.

O alcalde de Ponteceso, José Manuel Mato, destacou que “con esta intervención facemos realidade a nosa estratexia para consolidar un rural vivo e funcional. Cada quilómetro mellorado representa un impulso á calidade de vida das nosas veciñas e veciños, e supón apoiar a quen dedicou os seus esforzos ao campo”. Mato engadiu que “o plan municipal de mellora de pistas, en coordinación coas subvencións de AGADER, permite que a Xunta e o Concello sumen recursos e experiencia. Estas colaboracións son claves para fixar poboación e reactivar o primario desde o territorio”.

A actuación foi deseñada cumprindo os requisitos do plan coordinado por AGADER, entidade dependente da Consellería de Medio Rural, que ten entre os seus obxectivos impulsar o desenvolvemento rural e mellorar a calidade de vida no ámbito agrario.

O goberno local lembra que, baixo este plan de mellora de pistas municipais, continúa apostando por derrubar barreiras xeográficas, favorecer os accesos e revalorizar os espazos rurais. Con esta obra en Pazos, ademais de contar coa aportación da administración autonómica e fondos europeos, o Concello contribúe ao financiamento e garantía de execución cunha achega en torno á cifra de 48.000 € .

O Concello confía en que esta mellora supoña un cambio visible na vida rural, unha clarificación do compromiso tanto da administración local como das autonómicas e europeas, e unha mostra do potencial transformador do investimento público en zonas rurais.